საქართველოს პარლამენტის წევრი, მაჟორიტარი დეპუტატი დავით სონღულაშვილი, გურჯაანის მუნიციპალიტეტის მერის მოადგილესთან ლერი გელენავასთან და გურჯაანის მუნიციპალიტეტის საკრებულოს თავმჯდომარესთან ვანო ბერიძიშვილთან ერთად, კარდენახის, ბაკურციხის და ვეჯინის მოსახლეობას შეხვდა.

შეხვედრებზე სოფლებში არსებული საჭიროებებსა და მათი გადაჭრის გზებზე იმსჯელეს. ადგილობრივებისთვის მთავარ საკითხს კვლავ წყალმომარაგების გაუმჯობესება და შიდა საუბნო გზების მოწესრიგება წარმოადგენს. როგორც შეხვედრაზე აღინიშნა, კარდენახის და ბაკურციხის 24 საათიანი წყალმომარაგებისთვის საპროექტო, ხოლო ვეჯინში წყალმომარაგების სისტემების მშენებლობის სამუშაოები აქტიურად მიმდინარეობს. წყალმომარაგების პროექტის განხორციელების შემდეგ კი საგზაო ინფრასტრუქტურის მოწესრიგებაა დაგეგმილი. მოსახლეობამ ასევე ისაუბრა მუნიციპალური ტრანსპორტის საჭიროებაზე, რომლის გადაჭრისთვისაც გურჯაანის მუნიციპალიტეტის მერია აქტიურად მუშაობს.

"ჩემთვის, როგორც მაჟორიტარი დეპუტატისთვის მოსახლეობასთან მუდმივი, უწყვეტი კავშირი მნიშვნელოვანია, რაც შემდგომში უკვე საქმეშიც კარგად ჩანს. გურჯაანში არცერთი პროექტი არ განხორციელებულა ადგილობრივების უშუალო ჩართულობის გარეშე, იქნება ეს გურჯაანის ცენტრალური პარკი, ველისციხის რეაბილიტაციის პროექტი, ტექნოპარკი, ჯონ მალხაზ შალიკაშვილის სახელობის ქართული მხედრული ისტორიის მუზეუმის სრული რეაბილიტაცია, სხვადასხვა საგზაო თუ წყალმომარაგების პროექტი და ა.შ. ვფიქრობ, მსგავსი ტიპის თანამშრომლობას ყოველთვის მეტი შედეგი მოაქვს და მსურს, ასეთი მაღალი სამოქალაქო პასუხისმგებლობისთვის თითოეულ გურჯაანელს მადლობა გადავუხადო." - აღნიშნა დავით სონღულაშვილმა.

დღის ბოლოს შეხვედრა გაიმართა ა(ა)იპ "გურჯაანის სპორტული გაერთიანების" სპორტული ჯგუფების მწვრთნელებთან, სადაც სპორტში არსებულ გამოწვევებზე, საჭიროებებსა და სამომავლო გეგმებზე ისაუბრეს.